Dòie mamme

so trasute stammatina

dint’a cchiesa

da Madonna Addulurata:

una ca pregava

e n’ata ca spergiurava…

Ma chiù ca spergiurava

se dannava,

se deve ‘e pùnie ‘mpietto

e se sceppava a faccia.

Che dannazione!

E che dulore ò core guardanne

ch’esta mamma scunzulata

ca nun se d’à rraggione

manco ‘nu poco.

Tutt’à nu tratto

‘nu silenzio attuorno,

‘na voce forte

e senza scuorno:

“Pecchè te guardo

e nun me dici niente?

Comme s’io te guardasse inutilmente.

Vergine Addulurata pecchè

stù figlio mio?

Sulo vint’anni.

Pecchè nun me rispunne?

E dimme quacch’e cosa.

Me dice ca nunn’aggia chiagnere,

tu forse nun chiagnive?

Ma ò figlio tuojo

è figlio a Dio

e Dio accussì ha vuluto”…

Da ch’ella voce forte

se capisce a mala ciorta

ca se port’ appriess’a puvurella.

Guardanne attuorno

scuorge a tutt’à gente:

chi se lamenta po’ dulore forte,

chi chiagn’ e sbotte,

chi dice “mamma mia”,

chi chiamma ‘o Pateterno pe’ vulio,

e sotto voce quasi tutt’à cchiesa

“Ave Maria,Madonna mia”.

Po’ s’avvicina

e senza ‘na parola,

chell’ àta mamma

cu ‘n’angulo o’ core,

s’astregna ‘mpietto forte a puverella.

Cu ‘na voce

fine e forte

ca mette ‘nguollo

e brivide da morte,

le dice:

“Forza sora mia,

‘o figlio tuojo,

‘o figlio mio,

simme tutt’i figlie a Dio

e Dio accussì ha vuluto”.

E così sia…

Antonio Aprile